I
Rose! che belli rose!
Torna maggio!
Sentite addore ’e chisti sciure belle,
Sentite comme cantano ’aucielle.
E vuje durmite ancora…
Ih che curaggio!
Aprite ’sta fenesta, oje bella fata,
ché ll’aria mo s’è fatta ’mbarzamata:
Ma vuje durmite ancora,
Ih che curaggio!
Rose! che belli rrose!
E torna maggio!

II
Rose che belli rrose!
’A n’anno sano,
stóngo strujenno ’e pprete ’e chesta via!
Ma vuje nun v’affacciate…uh, mamma mia!
’I nun mme fido ’e stá
da vuje luntano…
E si ve stó luntano quacche ghiuorno,
pare ca vuje mme state sempe attuorno…
ca mme parlate e mm’astrignite
’a mano…
Rose! che belli rose!
’E n’anno sano…

III
Rose! che belli rose!
E vuje durmite!…
Ma nun ve sceta stu prufumo doce?
’E primmavera nun sentite ’e vvoce?
Ma vuje, core ’mpietto,
ne tenite?!
Vocca addurosa comm’a na viola,
’a primmavera mia site vuje sola!
Ma chesta voce vuje
nun ’a sentite?
Rose! che belli rose!
E vuje durmite!…