Vuje ca d’ ’e bbelle la cchiù bella site
veniteve a affaccià for’ ’o balcone…
Scetateve nu poco, nun durmite:
sentite quant’è doce ’sta canzone.

Chesta canzone ca io sto’ cantanno
è tutta sentimento e ’spressione
Che vène da nu core ’e passione…
stu core ca, pe’ vuie, soffre ’a n’anno!

Vurria addeventà chistu cuscino
addo’ ’sta faccia ’e rose vuje appujate…
Sul’accussì ve tenarrìa vicino
e vasarrìa sti ttrezze avvellutate.

Bella, ca d’ ’e bellizze ca tenite
facite mmiria ’e stelle ’e mmiez’ ’o cielo;
P’ ’o scuorno, ’a luna già s’ha mis’ ’o velo
pecché cchiù bella d’essa vui parite.

Tutte sti rrose ’e for’a ’sta fenesta,
aspettano ca forse v’affacciate…
Ve stanno priparanno già na festa
pe’ quanno vuje, da ’o suonno, ve scetate!

E si stu suonno, a vuje, ve dà arricietto,
pe’ me, ’o suonno, nun esiste maje…
Mme diceno ’e llenzole ’e dint’ ’o lietto:
“Si vène nénna toja, durmarraje!…”