Vierne è venuto e ’coppa a stu granato
sultanto na frunnella pennulea.
Sultanto chella fronna c’è restata,
e quanno passa ’o viento teculea.
Frunnella mia,
io dico ch’a speranza è comm’a tte:
pare che allora allora vo’ cadè.

Pere ’e granato, io pure fui lassato,
ma spero che non dura ’a lontananza.
A tutt’e dduje mo chesto c’è restato:
a te na fronna, a mme sul’ ’a speranza,
Frunnella mia,
tienete forte forte e nun cadè,
sì no me perd’io pure appriesso a tte.

Canta o granato e dice: Core, core,
Che te lusignhe a ffa, tutto fenesce.
Nasce ’a matina o sole e ’a sera more,
more nu sciore e n’ato già me cresce.
Oi core, core
’sta fronna e sta speranza, siente a mme,
ponno tricà, ma pure hann’ ’a cadè…