Trase p’ ’a porta,
pè nu fenestiello,
pè na fenesta, si t’ ’a scuorde aperta,
quanno meno t’ ’aspiette.

Pè copp’ ’e titte,
da na loggia a n’ata,
se ruciulèa pè dint’ ’a cemmenera.
E manco te n’adduone
quann’è trasuta:
pè copp’ ‘o curnicione
plòffete!, int’ ’o balcone,
e fa culazione
dint’ ’a cucina toja.

È ’a gatta d’ ’o palazzo
Padrone nun ne tene
Nunn’ è c’ ’a vonno male,
ma essa ’o sape
che manc’ ’a vonno bene.

Te guarda cu dduje uocchie speretate:
lèsa.
N’ha avute scarpe appriesso e ssecutate.
È mariola!
Ma ’a povera bestiella, c’adda fa?
È mariola pecché vò mangià.

È mariola…
Chest’ ’o ddice a’ ggente;
ma i’ nun ce credo, pecché, tiene mente:
tu lasse int’ ’a cucina,
che ssaccio …
nu saciccio.

Làsselo arravugliato
dint’ ’a na bella carta ’e mille lire.
Tuorne ’a matina:
’a mille lire ’a truove, che te crire?
Nzevata. Ma sta llà.