Ammore? E chi t’ ’o ddà?… Povero Ammore,
ca stive e’ casa a ’o vico d’ ’e suspire…
Lassate fa’, facitemo ’o favore…
Nu chilo ’e maccarune sta tre lire.

M’aggia spusà? E me sposo, sissignore.
’A mamma ha ditto: – E comme?… Te retire?
Bada, tu si ’nu giovine d’onore,
e chella nun fa chiacchiere: s’accire. –

Essa nun parla cchiù. Meza malata,
chiagne, e se tene mente stu vestito
ch’è ’nu poco liggiero p’ ’a vernata.

E me s’addorme ’mbraccia, quanno è sera,
pecché me tratta già comme a marito,
e j’ ’a tratto, quase, comm’a ’na mugliera…