I
Na casarella
pittata rosa
ncopp’’e Camaldole,
vurría tené:
Piccerenella,
p’ ’o sposo e ’a sposa,
comm’a na connola
pe’ me e pe’ te…
Dopp’ ’a fatica
mme ritirasse…
Tu, verbigrazia,
viene arapí…
Cu’ ’ammore, è facile
tutt’ ’o difficile:
Si ha da succedere,
succedarrà…
II
Na luggetella
’nfucata ’e sole,
cu ’aruta e ’anepeta
piantate ’a te…
Sta faccia bella,
mmiez’ ’e ’llenzole
spase pe’ ll’asteco,
vurria vedé…
Vurria annasconnerme
quanno passasse…
pe’ ffa, vasannote,
cucù-settè…
Cu’ ’ammore, è facile
tutt’ ’o difficile:
Si ha da succedere,
succedarrà…
III
Na cunnulella…
ninno picciuso…
’nfaccia doje fravule:
gulie ’e mammà…
Gnóra-vavella,
cu’ n’uocchio a ’o fuso,
canta, vucannolo:
“Michelemmà”…
Notte e silenzio…
Lietto sincero…
Doie braccia stregnerme
vurria sentì…
Cu’ ’ammore, è facile
tutt’ ’o difficile:
Si ha da succedere,
succedarrà…
